Seksuálalaš loavkašuhttin lea buotlágán sávakeahtes seksuálalaš láhtten man ulbmilin lea, dahje mii dagaha ahte dovddat lovkkiidan, ballan, vašuhuvvon, bilkiduvvon, cielahuvvon dahje mii lea unohas.

Dat maid nubbi sáhttá atnit mieleavttus ja sávahahtti seksuálalaš láhttemin, sáhttá fas nubbái dovdot váttisin hilgut, earenoamážit jus fápmogaskavuohta sudno gaskkas ii leat dássálaga, ovdamearkka dihte gaskal oahpaheaddji ja studeantta, dahje gaskal jođiheaddji ja bargi.

Seksuálalaš loavkašuhttin oahpahusdilis dahje barggus sáhttá mielddisbuktit heajut loaktima, psyhkalaš ja fysalaš dearvvašvuođaváttuid, ja billahuvvan oahpu dahje karrieara.  

Geatnegasvuohta eastadit ja čuovvulit

Bargiin ja studeanttain galgá leat áibbas dohkálaš oahppan- ja bargobiras.

Organisašuvnnaid ja oahppoásahusaid jođiheamis lea geatnegasvuohta eastadit seksuálalaš loavkašuhttima, ja sii galget geahččalit hehttet ahte studeanttaide ja bargiide čuohcá loavkašuhttin ja unohis láhtten. Dat galgá dahkkot kártema ja riskaárvvoštallama bokte, ja sii galget bidjat johtui dárbbašlaš doaibmabijuid loavkašuhttinvára unnideami váste.

Oahppo- ja bargosajis galget maiddái leat čielga ja oahpes bargovuogit dasa ahte mot studeanttat ja bargit sáhttet dieđihit ja almmustahttit loavkašuhttima birra, ja njuolggadusaid dakkár dieđuid gieđahallama várás.