Eaiggátvuohta

Dieđuid ja bohtosiid eaiggátvuohta sáhttá juogo leat muddejuvvon lága bokte, šihtton dahje árvvoštallon ásahusa bargguid vuođul ja/dahje ásahusa investeremiid vuođul olbmuid, ruđa, visttiid, reaidduid ja sullasaččaid hárrái.

Vuoigŋaduodjeláhka mudde dahkkivuoigatvuođa, ja danne ii leat dárbu makkárge registreremii. Dat suddje olbmodahkan dujiid dáidda-, dieđa- ja girjjálašvuođasurggiin dan beaivvi rájes go duodji ráhkaduvvo. Dat gusto jus ráhkaduvvon buvtta lea ođas ja originála, ja maid dahkki lea hábmen iežas persovnnalaš vugiin. Ovdamearkkat leat málagovat, báccit, girjjit, almmuheamit, eksámenbarggut, musihkka ja govat.

Oahpa eambbo maid lea lohpi geavahit dakkár buktosiin DelRett.no neahttasiiddus.

Eahpeávnnaslaš vuoigatvuođat (IPR)

Eahpeávnnaslaš vuoigatvuođat (Intellectual Property Rights dahje IPR) lea dahkkivuoigatvuođa ja  industriála vuoigatvuođa čoahkkedoaba, namalassii juridihkalaš aktovuoigatvuođat mat suddjejit vuoigŋadujiid.

Industriála vuoigatvuođat siskkildit earenoamážit pateanttaid, registrerejuvvon ja sajáiduhtton gálvomearkkaid ja designvuoigatvuođaid. Dakkár vuoigatvuođat veahkehit fitnodagaid ja dutkanásahusaid dárkkistit mot sin dieđut ja bohtosat adnojit, ja geat atnet daid.

Dieđuid ja bohtosiid geavaheapmi

Geahča bearrái ahte it “suolát” earáid jurdagiid, bohtosiid, teavsttaid, govaid ja sullasaččaid. Geahča IPR njuolggadusaid ja dieđuid ja bohtosiid geavaheami njuolggadusaid iežat oahppo- dahje bargosajis.